१२ भदौ, काठमाडौं । पहिरोका कारण बनेको तालबाट थप बाढीको जोखिम बढेपछि चीनले तिब्बतमा जारी उद्धार अभियान स्थगित गरेको छ।
अलजजिराले चिनियाँ राज्य सञ्चालित प्रसारकहरूलाई उद्धृत गर्दै चीन सरकारले उद्धार टोलीलाई घटनास्थलबाट एक किलोमिटर टाढा हट्न आदेश दिइएको छ। विनाशकारी पहिरोपछि तिब्बत क्षेत्रका अझै सयौँ मानिस बेपत्ता छन्।
चीनले तिब्बतमा पुनः बाढी आउन सक्ने उच्च जोखिम रहेको भन्दै शुक्रबार उद्धार कार्य स्थगित गरेको छ। तिब्बतमा गएको विनाशकारी पहिरोको दुई दिनपछि पनि सयौँ मानिसहरू बेपत्ता रहेको अवस्थामा राज्य-नियन्त्रित सञ्चारमाध्यमले सो जानकारी दिएको हो।
चीन-नेपाल सीमामा पहिरोपछि थुप्रिएको अत्यधिक भग्नावशेष र लेदोका कारण बनेको ताल भरिएर उद्धार टोलीहरू गइरहेको क्षेत्रतर्फ पानी बग्न थालेको चिनियाँ सरकारी प्रसारक संस्था सीसीटीभीले जनाएको छ।
‘सबै उद्धार टोलीहरूलाई सुरक्षित स्थानमा तयारी अवस्थामा (स्ट्यान्डबाई) रहन र थप निर्देशनको प्रतीक्षा गर्न आदेश दिइएको छ,’ सीसीटीभीले भनेको छ।
यसअघि उक्त क्षेत्रमा पुगेका आपत्कालीन टोलीहरूलाई ‘एक किलोमिटर पछि हट्न आदेश दिइएको छ,’ सीसीटीभीले थप जानकारी दिएको छ।
बुधबार तिब्बतको सीमावर्ती केन्द्र केरुङमा माटो र भग्नावशेषसहितको पहिरो खसेपछि उक्त ताल बनेको थियो। यस घटनामा सयौँ बेपत्ता भएको खबर छ।
सीसीटीभीका अनुसार निरन्तरको वर्षाका कारण आगामी तीन दिनसम्म तालको जलस्तर बढ्ने र सेप्टेम्बर १ (भदौ १६) आसपासमा उच्च बिन्दुमा पुग्ने अनुमान गरिएको छ।
यसले गर्दा ‘ताल फुट्ने जोखिम बढाएको छ, जसले तल्लो तटीय क्षेत्रमा बाढी पठाउन सक्छ र केरूङ बन्दरगाह तथा तल्लो तटीय क्षेत्रका अन्य ठाउँहरूमा थप क्षति पुर्याउन सक्ने सम्भावना छ,’ सरकारी समाचार एजेन्सी सिन्ह्वाले बिहीबार अबेर राति रिपोर्ट गरेको छ।
आपत्कालीन इन्जिनियरिङ टोलीहरूले स्थितिको सूक्ष्म निगरानी गरिरहेको सीसीटीभीले जनाएको छ।
शुक्रबारसम्म प्रकोपग्रस्त क्षेत्रबाट ४९९ चिनियाँ नागरिक र ५५५ जना विदेशीलाई सुरक्षित स्थानमा सारिएको सीसीटीभीले बताएको छ।
उद्धारकर्मीहरूले अझै बेपत्ता रहेकाहरूको खोजी गर्न ड्रोनमा आधारित थ्रीडी मोडलिङ र थर्मल इमेजिङ प्रविधिको साथै म्यानुअल (प्रत्यक्ष) खोजी कार्य गरिरहेका एएफपीले जनाएको छ ।
