१७ भदौ, काठमाडौं । बालरोग विशेषज्ञहरूले बाढीबाट प्रभावित बालबालिकालाई चिकित्सकीय सेवा तथा बालस्वास्थ्य सम्बन्धी सहयोग गर्न तयार रहेको बताएका छन् । बालरोग विशेषज्ञहरू नेपाल पेडियाट्रिक सोसाइटी(नेपास)ले विज्ञप्ति जारी गरी सहयोगका लागि प्रतिवद्धता जनाएको हो ।
यस्तो परिस्थितिमा शिशु, नवजात, कुपोषित तथा दीर्घरोग भएका बालबालिकाको स्वास्थ्य तथा सुरक्षामा विशेष ध्यान दिन आवश्यक रहेको नेपास बताएको छ ।
मानवीय संकटका बेला बालबालिका संक्रमण, कुपोषण, चोटपटक, असुरक्षित पानी तथा सरसफाइ, परिवारबाट अलग हुने अवस्था आउँछ’ सोसाइटीले भनेको छ, ‘मानसिक तनाव, उपेक्षा, हिंसा र दुर्व्यवहारको उच्च जोखिममा पर्न सक्छन् ।’
राहत तथा पुनर्स्थापनामा गुणस्तरीय स्वास्थ्य सेवा, औषधि तथा पोषण, सुरक्षित खानेपानी र सरसफाइ, मनोसामाजिक सहयोग तथा सबै बालबालिकाको संरक्षणलाई विशेष प्राथमिकता दिन नेपासको आग्रह छ।
प्रभावित क्षेत्रमा बालबालिकालाई आवश्यक चिकित्सकीय सेवा, परामर्श तथा बालस्वास्थ्य सम्बन्धी सहयोग उपलब्ध गराउन बालरोग विशेषज्ञहरू सदा तत्पर रहेको विज्ञप्तिमा उल्लख छ ।
नेपाल पेडियाट्रिक सोसाइटीमा करिब ८०० भन्दा बढी बालरोग विशेषज्ञ आवद्ध छन् ।
