१३ कात्तिक, काठमाडौं । लुम्बिनी लायन्सले अष्ट्रेलियन अलराउण्ड बेन कटिङलाई नेपाल प्रिमियर लिग (एनपीएल) का लागि अनुबन्ध गरेको छ ।
लुम्बिनी लायन्सले मंगलबार सामाजिक सञ्जालमार्फत कटिङलाई अनुबन्ध गरिएको जनाएको छ ।
३७ वर्षीय अलराउण्ड कटिङले विश्वका प्रमुख्य टी-२० फ्रेन्चाइज लिगहरु इन्डियन प्रिमियर लिग, बिग बास लिग, क्यारेबियन प्रिमियर लिग, पाकिस्तान सुपर लिग समेत खेलेको अनुभव छ ।
उनले अष्ट्रेलियाको राष्ट्रिय टोलीका लागि ४ ओडीआई र ७ टी-२० आई खेल खेलेका छन् । बेन कटिङ हार्ड हिटिङका लागि चिनिन्छन् । राष्ट्रिय टिममा धेरै खेल्न नपाए पनि फ्रेन्चाइज क्रिकेटमा भने बेन कटिङ परिचित नाम हो ।
सन् २०१८ मै श्रीलंकाविरुद्ध टी-२०आई मा डेब्यु गरेका कटिङले पछिल्लो पटक २०१७ मा टी-२० आई खेल खेलेका थिए ।
उनले बिग बास लिगमा ११७ खेल खेलेका छन् । यस्तै पाकिस्तानी लिगमा २७ र आईपीएलमा २१ खेल खेलेका छन् ।
कटिङको आगमनले एनपीएल र नेपाली क्रिकेटलाई अझ उचाइमा पुर्याउन मद्त गर्ने लुम्बिनी लायन्सको विश्वास छ ।
लुम्बिनीले यसअघि इंग्लिस विकेटकिपर टम मुर्सलाई अनुबन्ध गरिसकेको छ । नेपाली राष्ट्रिय टोलीका कप्तान रोहितकुमार पौडेल मार्की प्लेअर रहेको लुम्बिनीले मुख्य प्रशिक्षकमा भारतीय नन्दन फडनिसलाई अनुबन्ध गरेको छ । यस्तै नेपाली क्रिकेटका लेजेण्ड शक्ति गौचन लुम्बिनीको कन्सलट्यान्ट प्रशिक्षकमा छन् ।
नेपाल क्रिकेट संघ क्यानको आयोजनमा मंसिर १५ देखि पुस ६ गतेसम्म आयोजना हुने एनपीएलमा लुम्बिनीसहित ८ टिमले प्रतिस्पर्धा गर्नेछन् ।