काठमाडौँ । गृहमन्त्री रमेश लेखकले जाजरकोट भूकम्पले गरेको हानी नोक्सानीको विस्तृत विवरण आङ्कलन (डीडीए) माघ महिनाभित्र गरिसक्ने प्रतिबद्धता व्यक्त गरेका छन् । बुधबार राष्ट्रिय भूकम्प सुरक्षा दिवसको अवसरमा काठमाडौँको कीर्तिपुरमा आयोजित कार्यक्रमलाई सम्बोधन गर्दै उनले यस्तो प्रतिबद्धता व्यक्त गरेका हुन् ।
गृहमन्त्री लेखकले २०७९ सालको डोटी भूकम्पका साथै जाजरकोट र बझाङ भूकम्पबाट भएको भौतिक क्षतिको पुनर्निर्माणको लागि सरकार योजनाबद्ध तयारीमा जुटेको बताए । उनले भूकम्पबाट प्रभावित नागरिकका लागि अस्थायी आवास बनाउन ५० हजार सहयोग गर्ने निर्णय भइसकेको बताए । उनले भूकम्प प्रभावित नागरिकका लागि अस्थायी आवास निर्माणसम्बन्धी मापदण्ड मन्त्रिपरिषद्बाट पारित भई कार्यान्वयनमा गइसकेको उल्लेख गरे ।
गृहमन्त्री लेखकले भूकम्प र मनसुनजन्य विपद्बाट क्षति भएका निजी निवासहरूको पुनर्निर्माण, बलिया संरचना र सुदृढ पूर्वतयारीको महत्वबारे देशव्यापी बहस गर्नुपर्ने आवश्यकता रहेको बताए । उनले भने, ‘यस वर्षको मनसुनबाट क्षति भएका निजी निवासहरूको पुनर्निर्माण गर्नेक्रममा हामीले बलिया संरचना र सुदृढ पूर्वतयारीको महत्वबारे देशव्यापी बहस गर्नुपरेको छ । २०७२ सालको भूकम्पमा देशले व्यापक मात्रामा क्षति भोग्नुपर्यो । उक्त भूकम्पबाट देशले व्योहर्नुपरेको अधिकांश क्षतिग्रस्त सार्वजनिक संरचना तथा सम्पदाहरूको पुनर्निर्माण सम्पन्न भइसकेको छ ।’
गृहमन्त्री लेखकले २०७२ सालको भूकम्पबाट क्षतिग्रस्त सार्वजनिक संरचना तथा सम्पदाहरूको पुनर्निर्माणको काम सम्पन्न भइसकेको दाबी समेत गरे ।