२ असोज, काठमाडौं । मनास्लु संरक्षण क्षेत्रभित्र पदयात्रामा जाने पर्यटकका लागि स्थानीय सरकारले प्रवेश शुल्क तोकेको छ । यसअघि यस्तो शुल्क लिने सुरुवात सालेखुम्बुको पासाङल्हामु गाउँपालिकाले गरेको थियो ।
गोरखाको चुमनुब्री गाउँपालिकाले अब विदेशी पर्यटकबाट प्रवेश शुल्क बापत प्रतिव्यक्ति एक हजार रुपैयाँ लिने भएको छ ।
स्वदेशी पर्यटकले प्रतिव्यक्ति २ सय रुपैयाँ प्रवेश शुल्क तिनुपर्ने भएको छ ।
गाउँपालिकाले स्थानीय सरकार सञ्चालन ऐन २०७४ ले दिएको अधिकार प्रयोग गरी यो शुल्क तोक्ने निर्णय गरेको स्थानीय सरकारको निर्णयमा उल्लेख छ ।
गाउँपालिकाले यो शुल्क मनास्लु संरक्षण क्षेत्रकै संरक्षण र विकासमा खर्च गर्ने प्रतिबद्धता समेत जनाएको छ ।
स्थानीय सरकारले यो रकम पर्यटकको सुरक्षा, फोहोरमैला व्यवस्थापन, डढेलो नियन्त्रण, नयाँ तथा वैकल्पिक पदमार्थ निर्माण, बाटो–पुल निर्माणमा खर्च गर्ने बताएको छ ।
यसैगरी खानेपानी निर्माण, सेल्टर तथा चौतारी निर्माण, साइन पोष्ट तथा म्याप राख्ने, स्थानीयलाई पर्यटनसँग सम्बन्धित तालिम दिने योजना समेत स्थानीय सरकारको छ ।
उद्दार तथा राहतमा सहयोग र समन्वय, वातावरण संरक्षण, ताल संरक्षण, गुम्बा मर्मत तथा संरक्षण र होमस्टे व्यवसाय प्रवर्द्धनमा सहयोग पुग्ने कार्यक्रममा समेत यो रकम खर्च गर्ने प्रतिबद्धता स्थानीय सरकारको छ ।
विभिन्न स्थानीय तहले प्रवेश शुल्क तोक्दा दोहोरो शुल्कको मारमा पर्यटक पर्ने चिन्ता भने रहन्छ ।
विभिन्न निकुन्ज तथा संरक्षण क्षेत्र प्रवेश गर्न पर्यटकले अनुमति लिनु पर्छ । सो बेला सरकारले निश्चित शुल्क लिने गरेको छ ।
@अनलाइनखबर