२५ कात्तिक, काठमाडौं । राष्ट्रिय फोटो पत्रकार समूह नेपाल (एनएफपीजे)को अध्यक्षमा पुनः प्रदीपराज वन्त निर्विरोध चयन भएका छन् ।
शनिबार भएको २७औं साधारणसभा तथा १३औं अधिवेशनले राष्ट्रिय समाचार समिति (रासस)का फोटो पत्रकार वन्तको अध्यक्षतामा १५ सदस्यीय नयाँ कार्यसमिति चयन गरेको हो ।
समूहको वरिष्ठ उपाध्यक्षमा लेखबहादुर श्रेष्ठ, महिला उपाध्यक्षमा चन्द्रकला क्षेत्री, प्रथम उपाध्यक्षमा सुनील शर्मा, उपाध्यक्षमा नारायण सिलवाल, महासचिवमा घनश्याम श्रेष्ठ, सचिवमा प्रविन कुलुङ राई र कोषाध्यक्षमा प्रदीप श्रेष्ठ चयन भएका छन् ।
केन्द्रीय सदस्यमा सुशीलकुमार श्रेष्ठ, मुकुन्द कालीकोटे, रमिता छुँजु, हरिश सिंह नगाल, दिपेन्द्र महर्जन, अनुप प्रधान र सागर बस्नेत चयन भएका छन् । २०५३ मा स्थापना भएको सो समूह फोटो पत्रकारको पहिलो छाता सङ्गठन हो ।
समूहले फोटो पत्रकारको व्यावसायिक हकहित, पेसागत सुरक्षा, क्षमता विकास र फोटो पत्रकारिताको विकासका लागि विविध कार्य गर्दै आइरहेको अध्यक्ष वन्तले बताए ।
उक्त कार्यक्रममा हरिगोपाल प्रधान फोटो पत्रकारिता सम्मान फोटो पत्रकार गणेश बिष्ट, साहसिक फोटो पत्रकारिता सम्मान सुजन बज्राचार्य, पर्या-पर्यटन फोटोपत्रकारिता सम्मान’ प्रविन श्रेष्ठ, मनोरञ्जन फोटोपत्रकारिता सम्मान लेखबहादुर श्रेष्ठ र खेलकुद फोटो पत्रकारिता सम्मान सरोज नेपाललाई प्रदान गरिएको थियो ।
यसैगरी माधव थापा जोखिमपूर्ण फोटो पत्रकारिता पुरस्कार २०८१ बाट सिविन नेपालकी फोटोपत्रकार रमिता छुँजु, संस्थागत एनएफपीजे प्रेसिडेण्ट अवार्ड २०८१ बाट कार्यवहाक महासचिव घनश्याम श्रेष्ठ र उत्कृष्ट जिल्ला शाखा पुरस्कार रामेछाप शाखालाई प्रदान गरियो ।