पोखरा । सहकारी ठगी, सम्पत्ति शुद्धीकरण र संगठित अपराध आरोपका प्रतिवादी पूर्वडीआईजी छविलाल जोशीकाे बयान सकिएको छ । न्यायाधीश नितिज राईले उनीसँग २ दिन लगाएर बयान लिएका हुन् ।
जिल्ला प्रहरी कार्यालयले तयार पारेको अनुसन्धान रिपोर्ट र जिल्ला सरकारी वकिल कार्यालयको अभियोगपत्रका आधारमा राईले जोशीसँग २३ वटा प्रश्न गरेका थिए ।
‘सबै गरेर २३ वटा प्रश्न सोधिएको छ । विशेषगरी मूल आरोपहरुमाथि नै क्रस क्वयसन गरिएको हो,’ जोशीका वकिल जगन्नाथ ढकालले भने,‘सबै प्रश्नको जवाफ उहाँले दिनुभएको छ । प्रहरीमा भएको बयान र न्यायाधीशसँग गरिएको बयानमा खासै अन्तर छैन ।’
जोशीले आफूमाथि लगाइएका आरोपहरू झुटा भएको दोहोर्याएका छन् । उनीमाथि लागेको आरोपहरूमा इन्कारी बयान दिएका ढकालले बताए ।
‘आरोप जे कुरामा छ, त्यसमा इन्कार गरिरहनुभएको छ । उहाँको संलग्नताबारे स्पष्ट रूपले श्रीमानसँग (न्यायाधीश) आफ्ना कुरा राख्नुभएको छ,’ उनले भने ।
छविको बयान सकिने बित्तिकै अर्की प्रतिवादी लिला पछाईसँग बयान सुरु भएको छ । मंगलबार पछाईसँग बयान सकिएको छैन ।
बुधबार सार्वजनिक बिदा परेकोले बयान हुनेछैन । शुक्रबार पुनः अदालतमा बाँकी प्रतिवादीहरूको बयान हुनेछ । बयान सकिएपछि मात्रै इजलासमा थुनछेक बहस सुरु हुने अदालतका सूचना अधिकारी सुरज अधिकारीले जानकारी दिए । उनका अनुसार थुनछेक बहसअघि प्रतिवादी सबैको बयान लिनुपर्छ ।