१८ भदौ, काठमाडौं । नेपाल स्टक एक्स्चेन्जको आँगनमा १० फिट अग्लो साँढे (बुल) को मूर्ति बनिरहेको छ ।
तामा र पित्तल धातु मिश्रित ढलोटमार्फत बुलको मूर्ति निर्माण भइरहेको नेप्सेले जनाएको छ । विश्वका अन्य स्टक मार्केटअगाडि पनि बुलको मूर्ति राख्ने चलन छ । बुलले बढ्दो बजारको संकेत गर्छ, लगानीकर्ताले बुल मन पराउँछन् ।
अल्पकालीन अवधिमा बजार घटे पनि दीर्घकालीन रूपमा बढ्ने प्रवृत्ति हुने भएकाले विश्वका बजारमा बुलको प्रतीक राख्ने गरिन्छ ।
बुल प्रतिक निर्माणकै क्रममा छ, सम्भवतः दसैंसम्म तयार हुने नेप्सेका प्रवक्ता मुराहरि पराजुलीले बताए ।
उनका अनुसार यो बुलको प्रतीक १० फिट अग्लो र १२ फिट लम्बाइको छ भने तौल करिब १ टनको हुनेछ । भूकम्पपछि पुनर्निर्माणकै प्याकेजअन्तर्गत नेप्से परिसर सौन्दर्यकरण कार्यक्रमअन्तर्गत परिसरमा बगैँचा, साँढेको मूर्ति राख्नेगरी कार्य भइरहेको उनले बताए ।
नेप्से परिसर सौन्दर्यकरणअन्तर्गत १ करोड ४८ लाख रुपैयाँको योजना रहेको र त्यसैअन्तर्गत यो बुलको प्रतिक बनाइरहेको पराजुलीले बताए । चालु आर्थिक वर्षभित्र सौन्दर्यकरणको काम पूरा हुने र बुलको प्रतीक पनि तयार हुने उनले बताए ।
@अनलाइनखबर