२३ भदौ, काठमाडौं । राष्ट्रिय खेलकुद परिषद (राखेप)को बोर्ड बैठक अन्योलमा पर्दा १०औं राष्ट्रिय खेलकुदको कार्यविधि पास हुन सकेको छैन ।
युवा तथा खेलकुद मन्त्रीले अध्यक्षता गर्ने राखेप बोर्ड बैठकको मिति तय नहुँदा कार्यविधि पनि पास हुन नसकेको हो ।
राखेपले १४ दिनअघि युवा तथा खेलकुद मन्त्रालयमा कार्यविधि पठाएको थियो । मन्त्रालयका सचिव सुमनराज अर्यालले कार्यविधि निरीक्षणको काम सकिएको जानकारी दिए । ‘मन्त्रालयबाट हुने सम्पूर्ण कामहरु लगभग सकिएको छ । तर यो कार्यविधि पास गर्न राखेपको बोर्ड बैठक नै बस्नुपर्छ,’ उनले भने ।
राखेप बोर्ड बैठक कहिले हुने भन्ने अझै टुंगो नलागेको राखेप स्रोतले बतायो । ‘बोर्ड बैठकको लागि केही छलफल भएको थाहा छैन,’ स्रोतले भन्यो ।
१० औं राष्ट्रिय खेलकुद कर्णाली प्रदेशको सुर्खेतमा आगामी मंसिर २ देखि ९ गतेसम्म हुने तय भएको छ । तर कतिपयले पूर्वाधार तयारीको काममा भइरहेको ढिलाइका कारण पूर्वनिर्धारित मितिमा हुनेमा शंका व्यक्त गरेका छन् ।
@अनलाइनखबर