काठमाडौँ । नेपाल विद्युत प्राधिकरणका कार्यकारी निर्देशक कुलमान घिसिङले डेडिकेटेड र ट्रंक लाइन विवादका सम्बन्धमा आइतबार बसेको मन्त्रिपरिषद् बैठकले गरेका निर्णय आफूलाई आइनसकेको बताएका छन् ।
‘मलाई निर्णय आइपुगेको छैन । सञ्चारमाध्यममार्फत सुनेका चाहिँ छु । निर्णय अब लिखितमा मन्त्रालयमा आएपछि यसबारेमा छलफल होला’, सोमाबार बिहान रातोपाटीसँग उनले भने।
बक्यौता नतिर्ने उद्योगहरुको लाइन प्राधिकरणले कानुन बमोजिम काटेको उल्लेख गर्दै घिसिङले अब छलफल नभईकन यसै भन्न नसकिने बताए । ‘यो गम्भीर विषय छ । पैसा नतिरेपछि हामीले निर्णय गरेको कानुनअनुसार हो । काटिएपछि जोड्नका लागि त्यहाँ सर्टेन प्रक्रिया छ,किस्तालगायतका व्यवस्था छ’, उनले भने, ‘अब जोड्नलाई प्रशासनीय कुरा भए । क्याबिनेटले निर्णय गरेपछि यसबारे छलफल होला नि त !’
आइतबार बसेको मन्त्रिपरिषद्को निर्णयले विद्युत् महसुल नतिरेर काटिएका उद्योगमा सोमबार १२ बजेभित्रै लाइन जोड्ने निर्णय गरेको थियो । यस्तै बैठकले टाइम अफ डे (टीओडी) मिटरका आधारमा १५ दिनभित्र बक्यौता उठाउने निर्णय पनि गरेको थियो ।