८ कात्तिक, धनगढी । सुदूरपश्चिम प्रदेश सरकारले विभिन्न सेवा समूहका ४४ जना कर्मचारीको सरुवा गरेको छ ।
बुधबार बसेको प्रमुख सचिवस्तरीय बैठकको निर्णय अनुसार इन्जिनियरिङ सेवा, वन, स्वास्थ्य र सामान्य प्रशासन सेवा समूहका गरेर ४४ जना कर्मचारीको सरुवा गरिएको मुख्यमन्त्री तथा मन्त्रिपरिषद्को कार्यालयले जनाएको छ ।
मुख्यमन्त्री तथा मन्त्रिपरिषद्को कार्यालयकाअनुसार इन्जिनियरिङ सेवा तर्फ ९÷१० तहका चार जना, वन सेवातर्फ ९÷१० तहका चार जना, स्वास्थ्य सेवातर्फ ९÷१० तहका एक जनाको काज फिर्ता र प्रशासन सेवा, सामान्य प्रशासन समूह अधिकृतस्तर ७ र ८ तहका ७ जना कर्मचारीको सरुवा गरिएको छ ।
यस्तै, प्रशासन सेवा÷सामान्य प्रशासन समूह तह ५ र ६ तर्फका २४ जना, चौँथो र पाचौँ तहका चार जना कर्मचारीको पनि सरुवा भएको छ ।
इन्जिनियरिङ सेवा तर्फ खानेपानी तथा सरसफाइ डिभिजन कार्यालय डोटीका इन्जिनियर ग्रीष्म थापाको कैलाली, जलस्रोत तथा सिँचाइ डिभिजन कार्यालय दार्चुलाका इन्जिनियर डम्बरप्रसाद धितालको कैलाली र कैलालीका अमरबहादुर पालको जलस्रोत तथा सिँचाई डिभिजन कार्यालय डडेल्धुरा सरुवा भएको छ भने डडेल्धुरामा कार्यरत इन्जिनियर श्रीरामरथ खरेललाई जलस्रोत तथा सिँचाइ डिभिजन कार्यालय दार्चुला पठाइएको छ ।
वन सेवा समूहतर्फ उद्योग पर्यटन वन तथा वातावरण मन्त्रालयमा कार्यरत वन अधिकृत कृष्णदत्त भट्टको डिभिजन वन कार्यालय धनगढी सरुवा भएको छ भने धनगढीमा कार्यरत प्रमुख वन अधिकृत रामचन्द्र कँडेललाई डिभिजन वन कार्यालय पहलमानपुर पठाइएको छ ।
डिभिजन वन कार्यालय पहलमानपुरका प्रमुख रामविचारी ठाकुरको डिभिजन वन कार्यालय कञ्चनपुर सरुवा हुँदा त्यहाँ कार्यरत भीमप्रसाद कँडेललाई डिभिजन वन कार्यालय डडेल्धुरा पठाइएको मुख्यमन्त्री तथा मन्त्रिपरिषद्को कार्यालयले जनाएको छ ।
स्वास्थ्य सेवातर्फ प्रदेश स्वास्थ्य आपूर्ति व्यवस्थापन केन्द्रका प्रमुख १० औँ तहका वरिष्ठ कन्सल्टेन्ट रेडियोलोजिष्ट डाक्टर निरज अर्यालको काज फिर्ता गर्दै सेती प्रादेशिक अस्पतालमै पठाइएको छ।