काठमाडौँ । नेकपा (एमाले)ले काठमाडौँ महानगरपालिका वडा नम्बर १६ को अध्यक्षमा लक्ष्मीरत्न तुलाधरलाई उम्मेदवार बनाउने भएको छ ।
तुलाधरलाई उम्मेदवार बनाउन वडा, नगर र जिल्ला कमिटीबाट सिफारिस गरेको एमाले काठमाडौँका अध्यक्ष दीपक निरौलाले जानकारी दिए ।
२०७९ वैशाखमा भएको स्थानीय तह चुनावमा तुलाधर एमालेबाटै उम्मेदवार भएपनि कांग्रेस उम्मेदवार मुकुन्द रिजालसँग पराजित बनेका थिए । त्यसवेला रिजाल चार हजार १९ मतसहित विजयी हुँदा तुलाधरले तीन हजार तीन सय १० मत पाएका थिए ।
त्यस्तै एमालेले कीर्तिपुर नगरपालिका वडा नम्बर १ को अध्यक्षमा हर्ष महर्जन र ४ मा बद्री बुढाथोकीलाई उम्मेदवार बनाउने निर्णय गरेको छ । एमालेले कीर्तिपुर नगरको प्रमुखमा डा. सुरेन्द्र मानन्धरलाई उम्मेदवार बनाउने यसअघि नै निर्णय गरिसकेको छ ।