म्याड्रिड । यूरोपेली संघ (ईयू) बाहिरका नागरिकले आफ्नो देशमा किन्ने घरमा स्पेनले शतप्रतिशत कर लगाउने योजना बनाइरहेको छ ।
प्रधानमन्त्री पेद्रो साञ्चेजले यस्तो घोषणा गरेका हुन् । स्पेनको घरजग्गा बजारमा घरको पर्याप्त उपलब्धता नभइरहेको स्थितिमा यो समस्याको समाधान गर्न साञ्चेजले शतप्रतिशत करको घोषणा गरेका हुन् ।
पश्चिमले यति बेला निर्णायक चुनौतीको सामना गरिरहेको र त्यो चुनौती समाजलाई धनी घर मालिक र गरिब बहालवालाबीच विभाजित हुन नदिनु भएको पनि उनले बताए ।
सन् २०२३ मा ईयू बाहिरका बासिन्दाले स्पेनमा २७ हजार घर÷फ्ल्याट÷अपार्टमेन्ट किनेका थिए । उनीहरूले यी सम्पत्ति स्पेनमा आएर बस्नका लागि नभएर लगानी गरेर पैसा कमाउन किनेको म्याड्रिडमा आयोजित एउटा आर्थिक मञ्चमा साञ्चेजले भनेका थिए । स्पेनको घरजग्गा बजारमा उपलब्ध घरहरू बस्नकै लागि किन्न खोज्नेका लागि उपलब्ध होस् भनेर यो कदम चाल्न लागिएको पनि उनले बताए । करले कसरी काम गर्छ वा यसको समयसीमाको भने साञ्चेजले कुनै विवरण दिएका छैनन् ।
सावधानीपूर्वक अध्ययन गरेपछि यो प्रस्तावलाई आफ्नो सरकराले अन्तिम रुप दिने उनले बताएका छन् । सोमबार घरजग्गाको उपलब्धता सुधार्न साञ्चेजले एक दर्जनभन्दा धेरै उपायहरू घोषणा गरेका थिए । अन्य उपायमा सुपथ मूल्यमा घर उपलब्ध गराउने घर मालिकलाई कर छूट, पयर्टकहरू बस्ने फ्ल्याटमा उच्च कर र कसिलो नियमन लगायतका उपायहरू छन् ।
@एजेन्सी